بواسطة : Menna Mostafa - بتاريخ : الاتنين 23 يونيو 2025
الأسباب الداخلية لانهيار المباني وحدوث الشروخ
في كتير من الحالات بنسمع عن مباني حصل فيها شروخ أو حتى انهارت جزئيًا أو كليًا من غير ما يكون في زلزال أو أي كارثة طبيعية، وده بيكون سببه الأساسي الأخطاء الداخلية اللي بتحصل جوه المبنى نفسه أثناء التصميم أو التنفيذ أو حتى بعد ما المشروع يخلص، وأخطر ما في الموضوع إن الأسباب دي بتتكرر كتير ومحدش بياخد باله منها غير بعد فوات الأوان
أول سبب شائع هو سوء التنفيذ، وده بيشمل حاجات كتير زي إن العمال يركبوا التسليح بطريقة غلط أو يتم صب الخرسانة من غير دمك كافي أو حتى يتساب الفاصل الزمني بين الصبات من غير معالجة، التنفيذ الغلط بيؤدي مباشرة لضعف في مقاومة العناصر للتحميل وده بيظهر في صورة شروخ مبكرة أو انبعاج في الكمرات أو ضعف في الأعمدة
تاني سبب خطير هو أخطاء التصميم، وده بيحصل لما المهندس المصمم ما ياخدش في اعتباره كل الأحمال المؤثرة زي الأحمال الأفقية أو الزلازل أو حتى فرق درجات الحرارة، وكمان ممكن يحصل إن القطاعات تكون أقل من المطلوب أو التوزيع الإنشائي يكون غير منتظم وبالتالي المبنى بيكون غير آمن من البداية
غير كده في كمان عوامل تانية زي ضعف التربة أو استخدام مواد رديئة أو التعديل في المبنى بعد التنفيذ زي إزالة حائط حمال أو فتحات كبيرة بدون دراسة، وكلها عوامل بتأثر على استقرار المنشأ
نصايح مهمة لأي مهندس أو طالب في المجال الإنشائي:
افحص الخرسانة بعد الصب وراقب طريقة الدمك والمعالجة
راجع اللوحات كويس قبل التنفيذ، وخد بالك من التفاصيل الصغيرة
تابع نتائج الجسات وتأكد من مطابقتها لنوع الأساسات المختار
لو ظهرت شروخ في مراحل مبكرة لازم تتحلل السبب الحقيقي مش مجرد تغطية
تجنب أي تعديل بعد التنفيذ من غير مراجعة هندسية واضحة
وافتكر دايمًا إن سلامة المبنى بتبدأ من التفاصيل اللي ممكن غيرك يشوفها بسيطة
لمعرفه الكثير من المعلومات اضغط على الرابط التالي
إشعار هام
تؤكد إدارة pmogate.com أن الكتب والروابط المُتاحة مخصصة للمهندسين العرب مجانًا** دون استهداف أي ربح مادي، بهدف دعم المعرفة الهندسية. نلتزم بحماية حقوق النشر، وإذا لاحظت انتهاكًا يُرجى إبلاغنا فورًا لاتخاذ الإجراء الفوري (حذف الروابط وتصحيح الحقوق).
